كيكة السفنارية
CARROT CAKE
وصفة خفيفة وبنينة متاع كيكة السفنارية مزينة بكريمة الجبن المفوحة بالبرتقال.
فكرة إستعمال السفنارية في الحلويات ترجع للعصور الوسطى في أوروبا، وقت السكر و المحليات كانت غالية و موش الناس الكل تقدر تشريهم. لذا جات فكرة إستعمال السفنارية كمعوض للسكر. وهكا تخلقت كيكة السفنارية.
بديت نشم في ريحتها خارجة مالفرن فاوحة بالقرفة…
الوصفة
- في صحفة كبيرة، خلط المكونات الشايحة مع بعضها: الفارينة، كربنات الصودا، الملح، القرفة، السكر الأسمر، السفنارية، الجوز و الزبيب.
- خلط العظمات مع الفانيليا والزيت وخلط مليح. من بعد زيدهم على الخليط الأول.
- غلف وعاء الفرن بورق الفرن وحط الخليط في الوعاء.
- حط الكيكة تطيب على نار 180°C لمدة ما بين 35 و 45 دقيقة. بعد 20 دقيقة طياب، وقتلي تحسها بدات تحمر شوية مالفوق، غطيها بورق الفرن باش وجهها ما يتحرقش.
- باش تعرفها طابت مليح وإلا مازالت، إغرس سكينة في الوسط. إذا خرجت شايحة معناها راهي طابت.
- خرج الكيكة من الفرن وخليها تبرد.
- حضر الكريمة متاع الجبن.
- اخدم الزبدة مليح وطريها مع السكر المحور.
- زيدها الجبن.
- زيد قشور وعصير البرتقال.
- زين الكيكة بالكريمة والجوز.
- تنجم زادة تحد طبقة من كريمة الزينة في الوسط.
معلومات غذائية
- سعرات حرارية: 396
- كربوهيدرات: 62.1g
- كوليسترول: 74mg
- دهون: 14.4g
- ألياف: 3.2g
- بروتين: 8g
- دهون مشبعة: 2.4g
- حجم الحصة: 1 قطعة، بلاش كريمة الزينة
- صوديوم: 425mg
- سكر: 32.8g
صحة وبالشفاء!
