خبزة بسكويت
خبزة هواء
خبزة الهواء أو خبزة البسكويت. ما فماش دار تونسية ما تعملش وما تعرفش خبزة الهواء. يقولوا إلي تسمية خبزة الهواء جات من طريقة اعدادها إلي يا حبذا تكون في بلاصة مهوية ومفرشكة باش الكريمة متاعها ما تذوبش والخبزة تشد روحها مليح، بما إنو جداتنا ما كانوش عندهم ثلاجة.
الوصفة إلي كتبتها هنا ماهيش الوصفة الأصلية. أصلاً ما نتفكرش روحي مرة ذقت الوصفة الأصلية إلي تجي بالكرديان. كل دار وطريقتها في إعداد خبزة البسكويت وكل حد وشنوا الدلال والبنة إلي يحب عليها في خبزة البسكويت. فما شكون يحبها بالغلة الفرشكة كما البنان والفراز، فما شكون يحبها بالشكلاطة، أما ديمة لازم ولابد الفاكية تكون موجودة فيها.
الوصفة هذي هاي المفضلة عندي، ساهلة وبنينة برشة.
الوصفة
- اول حاجة نبداو بتحضير القهوة ونخليوها تبرد.
- اركض الكريمة لين تولي chantilly وزيدها مغرفتين كبار مالحليب المركز المحلى. خليها في الثلاجة.
- طري الزبدة مليح وزيد عليها بقية الحليب المركز المحلى وعجينة البوفريوة أو اللوز وأركضهم مليح مع بعضهم.
- حط كريمة الزبدة في الثلاجة لمدة 1 ساعة أو 10 دقايق في الفريزر (congélateur).
- المكونات الكل حاضرين، نتعداو لتحضير الخبزة.
- غطس البسكويت في القهوة الباردة ورصفهم على شكل مربع في طبق نظيف للتقديم. حول ما تنفخهمش.
- أعمل طبقة من كريمة الزبدة فوق البسكويت. حط شطر الكمية.
- أعمل طبقة أخرى من بسكويت بالقهوة.
- حط شطر كمية الكريمة Chantilly وذر عليها فاكية مهروشة.
- حط طبقة أخرى بسكويت بالقهوة.
- زيد طبقة أخرى من كريمة الزبدة وفوقها طبقة أخيرة متاع بسكويت بالقهوة.
- زين الخبزة بما تبقى من كريمة chantilly والفاكية المهروشة.
- خليها 1 ساعة في الثلاجة على الأقل قبل التقديم.
معلومات غذائية
- سعرات حرارية: 418
- كربوهيدرات: 39.5g
- كوليسترول: 64mg
- دهون: 26.9g
- ألياف: 2g
- بروتين: 6.9g
- دهون مشبعة: 13.3g
- صوديوم: 252mg
- سكر: 19g
صحة وبالشفاء!
