تارت الليمون والمورانج
تارت فرنسية بلمسة إيطالية
ساعات محاولات الترجمة فاشلة الله غالب لكن ان شاء الله تعجبكم الوصفة. أما بعد،
la tarte au citron meringuée وحدة من أفضل الوصفات عندي وعلى هذاكا اخترت نفتتح بها Treats Homemade.
التارت هذه أصلها فرنسي وهي تارت بكريمة الليمون و مالفوق meringue إيطالية نودكم و لا نشهيكم.
من أول ما تغرمت بالكوجينة جربت منها برشة وصفات حتى لين لقيت الوصفة “المثالية”. تبعوني وحدة وحدة…
- قص الزبدة مكعبات وخلطها مع الفارينة والملح بطرتوشة صوابعك باش الزبدة ما تسخنش و العجينة تهلك.
- اركض العظمة و زيدها للعجينة.
- زيد الماء بالشوية باش تلم العجينة.
- حاول ما تقعدش تعجن ياسر باش العجينة تجيك هايلة.
- لفها في ديمافري وخليها ترتاح في الثلاجة مدة ربع ساعة على الأقل قبل الإستعمال.
- حل العجينة بالقلقال مع الإستعانة بشوية فارينة و طيبها في الفرن لمدة 20 دقيقة على حرارة 180°C حتى لين تحمار شوية.
- حط قشور الليمون والعصير والسكر في كسرونة وخليهم على النار لين يغليو.
- اركض العظمتين وزيدهم للعصير. أقعد خلط لمدة 1 دقيقة.
- بعد الكسرونة على النار وزيد الزبدة. أقعد حرك بالشوية لين الزبدة تذوب الكل.
- حط الكريمة في صحفة بلار وغطيها بديمافري وخليها تبرد في الثلاجة. باش الكريمة ما تعملش هاك القشرة اليابسة مالفوق حاول تلصق الديمافري مباشرة على الكريمة.
- حط الماء والسكر على النار حتى لين حرارتهم توصل ل 118°C. الناس إلي معندهاش محرار (thermomètre) كيفي ماتخافوش. استنى الماء والسكر يغليو ويبداو يعمل فقاقيع كبيرة بيضاء. قطرة من السيرو (sirop) هذا في الماء البارد تولي كرة طرية.
- في الأثناء، اركض الأبيض متاع العظم لين يولي كتلة ثلجية.
- أقعد اركض الأبيض وزيد السيرو (sirop) بالشوية. الخليط يولي لماع. رد بالك من الطش!
- زين التارت متاعك في الأخر بالمورانج بإستعمال القرطاس وإلا كان ماعندكش تنجم تستعمل ظهر المغرفة باش تعمل زينة مالفوق.
- كان عندك شلومو (chalumeau) إستعملو في تحمير المورانج مالفوق. إذا ماعندكش، حطها في الفرن لمدة دقيقتين أو أقل. عس عليها يا دوب تحمار. رد بالك الفور ينجم يغدرك ما تغفلش عليها!
التارت حضرت يا جماعة! صحة وبالشفا!
