أوراق ملسوقة
وصفة أوراق ملسوقة ساهلة وما تطلبش وقت.
على خاطر البريكة جزء لا يتجزأ من سفرة رمضان، لازم أوراق الملسوقة موجودين في كل دار تونسية.
لكن كي تبدى ما تعيشش في تونس ويدهم عليك رمضان وتتوحش البريكة وتلوج على الملسوقة وما تلقاهاش، ما تحيرش واعملها وحدك في الدار. ساهلة ما فيها شي.
الوصفة
- خلط المكونات الجافة مع بعضها (فارينة + سميد + ملح) وزيدهم الزيت.
- زيد الماء الدافي وخلط.
- حط الخليط في الmixeur باش يرطاب و يتنحاو منه الكعابر.
- تنجم تزيد شوية ماء إذا حسيت الخليط خاثر برشة. ما يلزمش يكون جاري برشة زادة.
- سخن قلاية ما تلصقش على نار متوسطة.
- حل العجينة السايلة على القلاية باستعمال فوشة وخلي الورقة تطيب لين تشوف الأحراف يتنحاو وحدهم.
- حط أوراق الملسوقة الطايبين فوق بعضهم وغطيهم بمنديلة نظيفة باش ما يشيحوش.
- قبل ما تحل الورقة إلي بعدها، نظف القلاية بمنديلة شايحة وإلا papier.
- غطس زادة الفوشة في الماء بعد ما تحل كل ورقة. هكاكة تقعد نظيفة و العجينة ما تلصقش فيها وحلان الورقة يكون ساهل.
- إذا تغلف أوراق الملسوقة بمنديلة وتحطهم في كيس بلاستيك غذائي، يقعدوا لاباس عليهم حتى 5 أيام في الثلاجة.
- تنجم زادة تخبيهم في الفريزر (congélateur) لكن حاول تدهنهم بشوية زيت قبل.
صحة وبالشفاء!
