معجون البرتقال
الشتاء وقيت البرتقال الفرشك. نقترح عليكم المرة هذي دوزة فيتامينات وشميسة بنينة على طاولة فطور الصباح : معجون برتقال نودكم ولا نشهيكم.
الوصفة تتطلب وقت صحيح لكنها ساهلة وبنينة برشة.
تبعوا الوصفة وحدة وحدة …
الوصفة
- اغسل البرتقالات وقشرهم. إحتفظ بالقشور على جنب. قطع البرتقالات في شكل شرائح مستديرة ونحي القلوب والشوائب.
- خوذ شطر كعبة القارص وقصها شرائح مستديرة.
- حط الشرائح الكل في طنجرة كبيرة وخلطهم مع السكر وخليهم لمدة 4 ساعات.
- خوذ قشور البرتقال نحي منهم القشرة البيضاء وقص الباقي شرائح جويدة.
- اغمر القشور المشرحة بالماء وحطها تغلي على النار لمدة ربع ساعة. ثم صفيها وعاود حطها تغلي في ماء جديد لمدة ربع ساعة وعاود صفيها مرة أخرى.
- زيد القشور المغلية لخليط المعجون.
- حط البرتقال إلي بالسكر على النار لمدة 30 دقيقة. من بعد إرحيه مليح بالmixeur وأعصر عليه نصف القارص المتبقي وزيدو السكر فانيليا. رجعه على النار لمدة 35 دقيقة. حاول نحي الرغوة كلما تشوفها ظهرت.
- حط المعجون في الدبابز وهو مازال سخون. سكر الدبوزة واقلبها وخليها تبرد وهي مقلوبة. هكاكة تعقم الهواء إلي داخل الدبوزة بسخانة المعجون وما يفسدش فيسع.
صحة وبالشفاء!
