باريس-براست

المرة هذه جيتكم بوصفة متاع حلو فرنسي بامتياز : الباريس-براست!
هالديسار الدائري الشكل إلي يذكرنا بعجلة البسكلات تم اختراعه سنة 1910 للإحتفال بسباق الدراجات في الوقت هذاك بين مدينتيْ باريس وبراست.
الحلو هذا متكون من pâte à choux محشية بكريمة الزبدة بالبرالان.

الوصفة

Pâte à Choux

• قص الزبدة مكعبات وحطها مع الماء والملح على النار حتى الغليان. رد بالك لا الماء يبدى يغلي قبل ما الزبدة تذوب بالكامل.
• نقص في النار وزيد الفارينة بالكامل. خلط مليح باستعمال مغرفة لوح حتى لين العجينة تشيح من الماء. المرحلة هذه مهمة لانجاح الوصفة.
• نحي العجينة من على النار وأقعد خلط باش العجينة تبرد.
• اركض العضمات وزيدهم بالوحدة بالوحدة للعجينة وخلط مليح قبل ما تزيد كل عضمة.
• غلف طبق الفرن بورق الطهي ثم كون العجينة في الأشكال إلي تحب عليها.
• زين العجينة المشكلة باللوز ثم حطها تطيب في الفور لمدة 30 دقيقة أو أكثر. الفور لازمو يكون مسخن مسبقاً على درجة 180°C.
• وقتلي العجينة قاعدة تطيب، عمرك لا تحب الفور باش الباريس- براست يقعدوا منفجين. كيف يطيبو، خليهم يبردوا في وسط الفور وهو محلول.

كريمة الزبدة بالبرالان

• اركض أصفر العضم مع السكر حتى لين يبياضو من بعد زيد النشا.
• حط الحليب يغلي.
• زيد الحليب للخليط ثم حطه يطيب على نار متوسطة.
• وقتلي الكريمة تحضر، نحيها من على النار وخلطها باش تبرد.
• حطها في صحفة بلار و زيدها البرالان.
• خلي الكريمة تبرد لمدة 10 دقايق قبل ما تزيدها الزبدة الطرية.
• غطي الكريمة بورق cellophane يكون لاصق على الكريمة ثم خليها تبرد نصف ساعة على الأقل في الثلاجة.
• استعمل الكريمة باش تعمر بها الchoux أو الباريس-براست بواسطة القرطاس.

صحة وبالشفاء!