كيكة الفراولة

الربيع جاء وجاء معاه الفراولو…

فما ناس قاعدة تحاول تسترجع رشاقتها الصيف عالأبواب، وفما ناس، كيفي انا، المتعة متاعهم كي يبداو يحوسو بين أنواع الغلة يخممو في فكرة متع حاجة بنينة ينجم الواحد يحتفل بها برجوع الشميسة والطقس المزيان.
أول مرة في حياتي نستعمل اللبن في روسات. إي مانيش غالطة، نحكي على اللبن. أيا يا سيدي لقيتلكم حاجة بنينة بخلاف الكسكسي يجي بها اللبن. كيكة الفراولو هاذي بنة لا تقاوم. تبعوني…

كيكة

• خلط المكونات الجافة مع بعضها ؛ الفارينة والسكر والخميرة والملح.
• خلط معاهم الزبدة وهي باردة ومقصوصة مكعبات. حاول إستعمل طراتش صوابعك بش الزبدة ما تسخنش.
• لما تتحصل على خليط كي الرمل، زيد اللبن وخلط مليح.
• حط خليط الكيكة في إناء الفرن بعد ما تكون دهنته بالزبدة وطرف فارينة. طيبو على درجة 190°C لمدة 25 دقيقة تقريباً. تأكد من الطياب بإستعمال سكينة.
• وقتلي الكيك يحضر، خليه يبرد على حرارة الغرفة لمدة 20 دقيقة.
• من بعد قصوا على ثنين في الوسط باش تحط الكريمة المخفوقة (chantilly) والفراولو.

الفراولو

• نظف الفراولو وقصوا طروف كبار.
• زيدو السكر والزهر.

كريمة مخفوقة Chantilly

• إخفق الكريمة وزيدها السكر باش تتحصل على ال Chantilly. تنجم زادة تستعمل الباكوات الحاضرين من غير إضافة سكر.
• خليها تبرد في الثلاجة وحطها على الكيك وفي وسطو كي يبرد.

صحة وبالشفاء!