تارت بالفراز

          تارت بسيطة بالفراز والكريمة. 

في الوصفة هذي، قدمت طريقة إحترافية لعجينة التارت (Pâte sucrée amande). تنجموا تستغناو على الوصفة هذيكة وتعملوا pâte brisée ساهلة ومن غير تعقيد. تطيبها وتخليها تبرد قبل ما تحت فيها الكريمة والفراز. وصفة ال pâte brisée تلقاوها في الرابط هذا.

الوصفة

• حاول حط جميع المكونات على حرارة الغرفة لمدة 30 دقيقة قبل ما تبدى في إعداد الوصفة.
• اخدم الزبدة الطرية مع السكر المحور.
• حط اللوز المرحي، الملح والبيضة وخلط مليح.
• زيد الفارينة.
• حاول ماتخدمش العجينة برشة بعد ما تزيد الفارينة.
• حل العجينة شوية وغلفها في film alimentaire.
• خليها ترتاح 2 ساعات على الأقل في الثلاجة.
• حل العجينة بالقلقال ما بين زوز أوراق طبخ (papier cuisson) وحطها في ال moule.
• حط التارت النية في ال-congélateur لمدة 1 ساعة على الاقل.
• سخن الفرن على درجة 160°C.
• حط التارت في الفور دوب تخرجها من الcongélateur. خليها تطيب مدة 10 دقايق.
• نحي التارت من المول وإدهنها باصفر البيضة المخلط مع الماء، باستعمال فوشة. الطريقة هاذي تخلي التارت ما تتبلش وما توليش طرية لما نحطوا فيها الكريمة.
• زيد حطها في الفور تطيب لمدة 15 إلى 20 دقيقة اخرين.
• خرجها من الفرن وخليها تبرد.

• حط الحليب في كسرونة وحطه يغلي على النار.
• في صحفة أخرى، خلط أصفر البيض مع النشاء والسكر.
• زيد شطر كمية الحليب المغلي لخلط وحرك مليح.
• زيد الخليط على بقية الحليب إلي في الكسرونة ورجعهم على النار.
• طيب الكريمة على نار متوسطة مع التحريك المستمر.
• كي تبدى تعقاد شوية، زيد العطرشية.
• كمل حرك لين تطيب وتولي تغلي لمدة دقيقة.
• نحي الكسرونة من على النار.
• زيد الزبدة وحرك لين تذوب كلها.
• حط الكريمة في صحفة وغطيها بfilm alimentaire. لازم يكون لاصق في الكريمة.
• خليها ترتاح في الثلاجة لمدة 2 ساعات.

• خرج الكريمة من الثلاجة.
• اخدمها بالركاضة لمدة دقيقتين، حتى تولي ملساء.
• حط الكريمة فوق عجينة التارت الطايبة.
• زين بالفراز.

صحة وبالشفاء!