عصيدة الزقوقو
ASSIDA ZGOUGOU
وصفة عصيدة الزقوقو التونسية.
بالنسبة للناس إلي ماتعرفهاش، عصيدة الزقوقو هي كريمة متاع حبات الصنوبر الحلبي إلي ينبت بكثرة في غابات شمال إفريقيا.
نطيبوا العصيدة عادة للإحتفال بالمولد النبوي الشريف إلي تكثر فيه المدائح والأذكار وتلاوات القرأن الكريم وتتزاور فيه العايلة والأقارب وتطيب فيه العصيدة وتتفرق على العيلة والجيران والأصحاب.
الوصفة هذي هي وصفة عائلية ونجاحها مضمون إذا تتابع خطوتها مليح… وبالطبيعة البنة مضمونة…
الوصفة
- حل الزقوقو المرحي في شطر كمية الماء (عادة نخليه يتنفخ ليلة كاملة)، من بعد صفيه في غربال شعر (جويد برشة) على مرتين بش تتحصل على سائل أرطب من غير شوائب.
- زيد الفارينة مع بقية كمية الماء وصفي مرة أخرى بالغربال.
- حط الخليط يطيب على نار متوسطة وأقعد ديمة حرك بمغرفة لوح (أو ما يسمى بالمدلك).
- العصيدة باش تبدى تعقاد، أو تكلفز. نقصف النار و كمل أدلك حتى لين ترجع ترطاب من جديد.
- زيد الحليب المركز المحلى… وديمة أدلك.
- زيد السكر والعطرشية. في المرحلة هذي العصيدة تولي تلمع أكثر ولونها يزيد يغماق.
- كمل إدلك شوية أخر ونحي العصيدة من على النار.
- حط العصيدة في الكيسان وإلا الصحاف قبل ما تبرد.
- توة نحضرو الكريمة العربي.
- خلط أصفر العظم والسكر والنشاء مع بعضهم لين يبياضو.
- غلي الحليب وزيده بالشوية للخليط.
- حط الخليط على النار المتوسطة وحرك الكريمة لين تعقاد.
- زيد العطرشية.
- صب الكريمة فوق عصيدة الزقوقو.
- زين الصحاف وإلا الكيسان بالفاكية.
- العصيدة تنجم تصبر في الثلاجة حتى لأسبوع أو أكثر بالأخص كي تبدى بلاش كريمة مالفوق.
